非洲力量崛起　摩洛哥埃及入奧運男足4強

東網電視

蘇菲安拉希美(右)今屆奧運已入5球。(Getty Images)

今屆奧運男子足球，非洲球隊成為大贏家，4強佔兩席，摩洛哥喺周五(2日)深夜8強以4比0大勝美國，至於埃及淘汰巴拉圭，兩隊分別屬於上下線區，意味有機會上演「全非洲」決賽戲碼。

摩洛哥首場分組賽爆冷擊敗阿根廷後，愈戰愈勇，上仗最後一輪分組賽大勝伊拉克3比0，力壓阿根廷，以小組首名出線，8強避開東道主法國，遇上實力較弱嘅美國，佔盡上風。

摩洛哥29分鐘獲得12碼，由蘇菲安拉希美主射入網，呢位28歲前鋒今屆4場比賽都有波入，合共有5球進帳，排射手榜第1位。

換邊之後，摩洛哥再由艾高馬治、阿舒拉夫、馬奧賀比各建一功，贈美國4蛋，將於4強對西班牙。至於上屆銀牌得主西班牙憑巴塞隆拿中場費明盧比斯梅開二度，加上艾比雷斯入1球，以3比0大勝日本。

另外，埃及同巴拉圭法定時間打和1比1，加時仍然不分勝負，最後埃及憑互射12碼贏5比4，晉級4強對東道主法國。

奧運男子足球4強形勢

摩洛哥男奧足 Vs 西班牙男奧足

法國男奧足 Vs 埃及男奧足

on.cc東網