東網電視
更多新聞短片
巴西女足將入球獻給瑪達。
周日(4日)凌晨女奧足8強賽事，巴西女足喺「女球王」瑪達停賽下，尾段入波1比0擊敗東道主法國女足昂然晉級4強，亦令宣布巴黎奧運後退役嘅瑪達，仍然繼續向住金牌夢進發。
巴西女足今場處下風，法國女足上半場16分鐘曾有12碼宴客，39分鐘又有巴菲接應角球頂中楣，結果巴西女足憑波迪奧82分鐘一箭定江山贏波，呢位前鋒入球後即指住看台上嘅瑪達，示意將入球獻畀佢。
38歲嘅瑪達第6次出戰奧運，但之前只拎過2次銀牌，佢上場食紅牌後痛哭，因為巴西女足如果今場出局，上場就係瑪達國際賽生涯句號。依家巴西女足晉級4強，意味今屆仲有2場要踢，瑪達喺看台上見證入波後，瘋狂揮拳兼大叫、又畀心心手勢慶祝，相當激情。
巴西女足4強將會對西班牙女足，後者喺8強靠互射12碼淘汰哥倫比亞女足。至於奪標大熱美國女足，憑洛雯加時一箭定江山，1比0淘汰日本女足，4強將會惡鬥德國女足。
