卡華積同皇馬攤牌　準備去中東搵食

現時正在為西班牙備戰歐國聯嘅右後衞丹尼爾卡華積，亦要忙於處理前途問題，根據「轉會權威」記者羅曼諾(Fabrizio Romano)爆料，呢位32歲老將計劃同皇馬管理層傾續約問題，如果會方唔開出新約，佢明夏就會自由身離隊，好可能轉投中東球會。

丹尼爾卡華積將於明夏約滿，皇馬一向對於是否同30歲以上球員續約有保留，並且多數只會開出1年合約，呢位右閘下季能否留隊，成為疑問。據悉卡華積考慮到球員生涯所餘無多，唔會勉強「銀河艦隊」開出長約，甚至有興趣仿傚2位前隊友拿祖費南迪斯、祖斯盧辛馬田去中東掘金，其中拿祖今夏加盟沙特阿拉伯豪門艾卡迪沙，祖斯盧辛馬田加盟卡塔爾球隊加拉法。

丹尼爾卡華積2013年由利華古遜轉投皇馬，一直效力至今，合共上陣421場，射入13球及64次助攻，並且係西班牙奪得今屆歐國盃冠軍嘅主力，以佢嘅級數，相信可以吸引各大沙特豪門開出「肥約」搶人。