港超聯　傑志主場1比1賽和冠忠南區

「中銀人壽香港超級聯賽」周六（14日）尾場賽事假旺角大球場上演，由上場聯賽失分的傑志主場鬥冠忠南區。雖然上半場有基哥利率先開紀錄，結果完場前「藍鳥」憑祖連奴的入球，以1比1賽和冠忠南區，雙方各袋一分。

「藍鳥」今場改由王振鵬把關，派出鐘樂安、利亞倫、裴栽釪等新兵擔正，祖連奴、迪美路夫先列後備，泰利、慈英則不在大軍名單之列；南區陣容方面，由歸隊的伍瑋謙負責把關，佐佐木周負責派牌，協助基哥利攻堅，艾華、史提芬彭利拿先列後備。

開賽初段，場濕地滑下影響雙方控球組織攻勢，13分鐘，韋頓左路壓入禁區窄位射入，但經球證VAR確定球員越位在先，判入球無效。23分鐘，基哥利起腳但中柱。32分鐘，南區換入黎格爾代替受傷的陳凱柏，7分鐘後，南區火力全開，39分鐘，基哥利接應佐佐木周長傳，門前抽腳射入，為南區率先打開紀錄，南區半場以1比0領先。

下半場，雙方均有換人調動，傑志先後換入祖連奴、迪美路夫、巴登卡、潘沛軒；南區亦陸續調入川瀨浩太、史提芬彭利拿、游卓峰。78分鐘，史提芬彭利拿左路推入禁區外起腳，未能命中目標。86分鐘，川瀬浩太飛身倒掛救出對方射門。南區救出後的4分鐘，祖連奴臨完場前接應利亞倫射入，為傑志扳平比數至1比1。最終雙方打成平手以1比1完場。

傑志開季聯賽兩連和，仍未打開勝利之門，主教練卡度素認為球隊未能獲勝，比較欠運：「球隊啱啱開波嘅狀態幾好，可惜之後有少少失去節奏，仲被對手領先，但下半場踢得唔錯，贏唔到有啲唔好彩。」卡度素又提到，因為本季聯賽打3循環，有時間讓球隊追趕，相信「藍鳥」仍有機會爭奪聯賽冠軍。

南區末段失守，痛失兩分，主教練楊正光大讚球員踢出「南區精神」：「無論對住咩對手，同賽果係點都好，大家都會戰鬥到底，甚至去到最後都有機會贏波，呢個係南區嘅精神，好欣慰見到球員踢得咁搏命。」對於陳凱柏及恩奴在上半場傷出，「光Sir」坦言傷患為比賽一部分，慶幸幾位後備球員「完全幫到手」：「Kota（川瀨浩太）同游卓峰出到嚟完全做到嘢，例如『峰仔』臨尾都好肯衝上去搏入波，雖然佢唔係成日有得出，但有機會佢一定去到盡。」