东网电视
更多新闻短片
维拉喺欧联旗开得胜。
阿士东维拉相隔41年后再战欧联，周三(18日)凌晨作客3比0大破瑞士年青人，不过主力前锋奥尼屈坚斯下半场伤出后，要用冰袋敷住右脚，为呢场胜仗蒙上污点。
维拉喺81/82球季首次踢欧冠杯(欧联前身)就夺冠，之后1年踢多一届(8强出局)就绝迹呢项顶级赛事，相隔41年后再战，赛前传出82年夺冠功臣加利梳尔去世消息。
维拉27分钟由泰利文斯开纪录，屈坚斯隔后助攻积及蓝斯拉开比数，不过屈坚斯喺60分钟受伤退下火线，用冰袋敷住右脚足踝，维拉尾段再由阿马度奥拿拿埋斋，大胜3比0。
维拉领队艾美利赛后表示：“我哋延续维拉喺42年前嘅路，呢场胜仗献畀加利梳尔同佢家人。呢场比赛唔易踢，但有上季欧协联经验，我哋90分钟都保持专注，而且尊重对手。”
对于屈坚斯嘅伤势，艾美利就派定心丸：“佢踢得好好，换走人只系同其他球员一样，佢OK呀！”
