達史特根累事　巴塞隆拿1比2不敵摩納哥

西甲開季5連勝嘅巴塞隆拿，周五(20日)凌晨歐聯慘遇滑鐵盧，作客摩納哥輸1比2，德國教練費歷克上任後首嘗敗仗。巴塞今場輸波罪人係門將達史特根，佢喺早段「自殺式」交波累隊友食紅牌，兩個失球亦要負上唔細嘅責任，表現令人失望。

今場開波10分鐘，達史特根後場組織，眼見中堅艾利加西亞被南野拓實緊纏仍夾硬交波，結果真係被搶走，艾利加西亞情急下將對手拉跌而食紅牌。踢少個嘅巴塞16分鐘就失守，達史特根未有守好近柱，對艾基奧治射門全無反應目送個波近柱入網。

巴塞劣勢下仍嘗試反撲，拉明耶馬28分鐘個人表演射入追平，不過喺10人應戰下，下半場無以為繼，摩納哥前鋒伊蘭尼基拿71分鐘單刀射門，個波雖然有力度但全無角度，點知達史特根竟然將個波撲入網，摩納哥爆冷贏2比1。

德國門將達史特根賽後表示：「我同艾利加西亞默契唔夠，我戥佢難難過，呢啲事唔應該發生，但足球場就會發生呢種事。我哋喺10人應戰下仍然嘗試搶分，輸波感覺唔好受，我哋要盡力爭取下仗喺主場贏波。」