拜仁報仇失敗　仲有哈利卡尼受傷

周日(29日)凌晨德甲大戰，走勢凌厲嘅拜仁慕尼黑今季全勝紀錄斷纜，主場出擊只能逼和上季冠軍利華古遜1比1，近4次鬥呢支宿敵，都未能取勝，仲有射手哈利卡尼受傷，嚟緊周四(10月3日)凌晨歐聯作客阿士東維拉，上陣成疑。

拜仁慕尼黑之前3次對利華古遜，僅1和2負，上季更被對手搶走德甲冠軍，導致聯賽11連冠結束。拜仁今季由新帥高柏尼執教下，首4場聯賽全勝，力爭今場順勢贏埋利華古遜。

不過，事與願違，上半場31分鐘，拜仁被對手攻破大門，利華古遜中場安特列治遠射入網，打開紀錄。僅過8分鐘，拜仁迅速扳平，20歲中場新星阿歷山大柏夫洛域遠射入世界波。

換邊之後，拜仁原本有機會反超前，但係基拿比近門起腳，卻中柱彈出，其後拜仁攻勢一浪接一浪，但都未能再入波。

值得一提，拜仁首席射手哈利卡尼今場竟然0射門，並且喺86分鐘傷出，賽後拜仁行政總裁迪辛表示，呢位英格蘭國腳傷勢並唔嚴重，但需要接受進一步檢查。拜仁慕尼黑和波之後，仍然排榜首。