亞冠盃2　慘遭反勝　陳嘉豪：遺憾守唔到半場

理文周三（2日)晚假新加坡惹蘭勿刹體育場上演「亞冠盃2」分組賽，作客淡濱尼流浪，結果理文在領先一球的情況下遭主隊反勝，以1比3吞敗，門將陳嘉豪對下半場未保住領先優勢感到遺憾，盼重整旗鼓後於主場力爭分數。

開局僅4分鐘，理文憑李毅凱射入罰球先開紀錄，惟補時階段遭追和，下半場再連失兩球，「嘉豪」對賽果表示遺憾：「本身我哋上半場有個好好嘅開局，早段已經入到一球，但完半場之前球隊犯咗啲失誤，加上下半場搶攻嘅時候暴露咗啲防守空位，畀對手攞到機會入攝，導致最後贏唔到波，守唔到半場我覺得好遺憾。」「嘉豪」亦認同早段因保連奴完半場前受傷，對於整體戰術部署有一定程度影響。

下半場主隊換入輔鋒久乗聖亜等主力，陳嘉豪飛身救險將其射門擋出，賽後獲現場球迷拍掌打氣，「嘉豪」萬分感謝球迷鼓勵，盼月中於主場全取3分：「真係衷心多謝佢哋香港飛過嚟，犧牲自己時間假期嚟支持我哋，能夠出外作客都有成班球迷支持，我哋會繼續努力，球隊目標一定係希望喺主場球迷面前攞到3分。」