又嚟？坦哈格撻數據：我係冠軍保證！

曼聯開季成績差勁，領隊坦哈格面對極大壓力，不過呢位「自信帝」近日接受《天空體育》訪問，再次表明曼聯係以冠軍為目標，而佢嘅往績就係「冠軍保證」。

坦哈格表示所有職球員都支持自己：「我哋每場比賽之後都坐埋交換意見，確保大家有共同目標，同時亦要爭取勝利，呢兩季我哋已經證明咗。我嘅生涯履歷，已經證明我會經常捧盃，過去6年我贏過8個冠軍。曼聯嘅目標就係捧盃，以及喺聯賽盡量爭取高排名。」

坦哈格執教曼聯2季，先後贏得英聯盃同英足盃冠軍，之前執教阿積士4年幾時間，亦贏過3次荷甲冠軍、2次荷蘭盃冠軍同1次荷超盃冠軍。