海倫承認體重超標　難以應付90分鐘比賽

曼聯前鋒海倫季前受傷，直至上月下旬先至復出，呢位21歲丹麥國腳承認養傷期間體重上升，現時仍然有超重情況，難以應付90分鐘比賽。

海倫今季為曼聯各項賽事5次披甲，僅於歐霸盃入1球，其中3次後備上陣，另外2次即使擔任正選，但未夠70分鐘就被換走，周日(13日)凌晨歐國聯丹麥作客西班牙，佢等到78分鐘先至後備上陣。

海倫話：「受傷之後體重上升，好難踢足90分鐘，但已經開始減肥，效果唔錯，身體感覺良好，唔需要心急，以免再次受傷。」丹麥將於嚟緊周三(16日)凌晨歐國聯作客瑞士，估計海倫仍然會先做後備。