拜仁死心未？傳華迪斯將續約利華古遜

利華古遜上季勇奪德甲冠軍，21歲中場科利安華迪斯光芒四射，一直有傳拜仁慕尼黑計劃明年夏天，動用1億歐元將佢招攬。不過德國《踢球者》近日爆料，科利安華迪斯暫無離隊意欲，甚至準備同利華古遜續約。

科利安華迪斯年紀輕輕就成為德國隊主力，同拜仁慕尼黑嘅穆斯亞拿組成「雙核」效果理想，拜仁亦想喺球會撮合呢對「夢幻二人組」。據《踢球者》報道，科利安華迪斯對自己喺利華古遜發展非常滿意，唔心急喺現階段轉會，老竇兼經理人漢斯佐基姆亦表示：「一個年輕球員，最需要嘅係一隊可以經常上陣嘅球隊，我哋同利華古遜一直保持好好嘅溝通。」

科利安華迪斯同利華古遜嘅約合去到2027年夏天，據報雙方為表合作誠意，準備喺原有合約再延長多1年到2028年夏天，似乎拜仁明年夏天嘅收購計劃未必能夠實行。