東網電視
更多新聞短片
西班牙喺2024年表現接近完美。(Getty Images)
西班牙喺2024年大豐收！周二(19日)凌晨歐國聯A4組煞科戰對瑞士，係「狂牛兵團」今年最後一戰，佢哋最終憑拜仁沙拉高薩補時絕殺，主場3比2贏波，今年正式國際賽「埋單」有12勝1和不敗佳績，表現近乎完美。
西班牙賽前已鎖定首名，今場起用大量副選同新人，仍然憑耶利米賓奴同拜仁基爾入波兩度領先。雖然瑞士兩次追成平手，但西班牙始終技高一籌，喺最後補時3分鐘獲得12碼，拜仁沙拉高薩操刀射入，最終3比2贏波。
唔計熱身賽，西班牙喺2024年踢咗13場正式國際賽，成績為12勝1和，創下西班牙史上年度最多贏波紀錄，期間贏埋最重要嘅歐國盃冠軍。西班牙領隊富安迪賽後表示：「我以自己係西班牙人為榮，我哋想用贏波嚟完結2024年。相信我，當你習慣咗贏波，就會一直贏，西班牙依家踢得好出色，亦擁有光明嘅未來。」
