格連活特又入致勝球　創馬賽30年紀錄

曼聯喺英超大勝，呢邊廂紅魔棄將格連活特喺法甲亦有「士哥」，為馬賽射入致勝12碼，主場贏摩納哥2比1，格連活特13場法甲9球2助攻數據，亦係馬賽30年來最高紀錄，可見「綠木」逐漸重返高峰。

格連活特在曼聯時期曾創下多項青年紀錄，但因家暴問題無法在曼聯立足，今夏以2,600萬歐元轉投馬賽，經過半季愈踢愈好，今場對摩納哥除咗入波，亦交出5次射門3次中框，4次突破、1次爭頂同2次搶斷，15次地面對抗贏5次，同埋3次製造對手犯規。

今場入波後，格連活特成為馬賽近30年最佳前鋒，僅次於1993/94年巴西名將桑尼安達臣，當年桑尼安達臣效力馬賽頭13場法甲入12球，不過當年佢只係借將，最終上陣24場取得16球4助攻，呢項神紀錄至今都未有後來者。

格連活特已經係最接近呢項紀錄嘅前鋒，而且最大分別係，格連活特並非借將，而係長期效力球員，預期格連活特將會更受馬賽重用，只要持續進步，有條件成為馬賽神鋒。