紐亞肋骨受傷今年玩完　拜仁照續新約

德甲勁旅拜仁慕尼黑周二(10日)宣布，門將紐亞因為肋骨受傷，將會缺席今年餘下賽事。紐亞養傷呢段時間都有好消息，據報拜仁慕尼黑決定同佢續約多1年，紐亞將會為拜仁踢到40歲！

38歲嘅紐亞仍然係拜仁正選門神，佢嘅合約到明年夏天完結，雖然唔少聲音認為球會應該安排接班，不過德國《踢球者》報道，拜仁對紐亞仍然好有信心，將同佢續約至2026年夏天，依家只差最後細節就可以落實。

已經退出德國國家隊嘅紐亞，今季犯錯次數增加，而且傷患亦更加頻密，領隊高柏尼周二透露：「紐亞助骨骨折，今年之內應該都唔可以再上陣，希望佢1月份可以回歸，但依家言之尚早。」