新C朗再淪為人球　下一站返賓菲加

出道初期被譽為「新C朗」嘅祖奧菲歷斯，今季重返車路士短短4個月可能又要離隊，據報其母拿賓菲加向車路士探盤，希望借用半季，而車路士則傾向將佢出售。

葡萄牙傳媒報道，賓菲加正同車路士談判，討論借用祖奧菲歷斯半季，暫時未有結果。不過車路士上場對富咸，祖奧菲歷斯坐足90分鐘冷板，主帥馬利斯卡更直言祖奧菲歷斯同高爾彭馬位置重疊，所以唔用佢。

25歲嘅祖奧菲歷斯生涯兜兜轉轉，好似人球咁被踢嚟踢去，佢喺賓菲加出道後加盟馬體會，試過外借車路士同巴塞隆拿，今季車路士同馬體會互相收購對方球員，干拿加歷查同祖奧菲歷斯交換而轉投車路士，至今上陣16場交出5球2助攻，不過多數喺歐協聯登場，假如外借重返賓菲加，對於車路士影響不大。