东网电视
更多新闻短片
安东尼错失绝佳入球机会。
曼联喺英超3比1反胜修咸顿，阿密特迪亚路表现惊为天人，正所谓“冇比较冇伤害”，巴西翼锋安东尼马菲奥斯就用行动证明“水货”之名，半场入替嘅佢曾有黄金机会，但门前2码面对空门竟然撞番个波畀门将，完美帮修咸顿“解围”。
曼联上半场表现差劲兼落后，领队鲁宾艾摩廉半场用安东尼入替明奈，59分钟一次美妙组织，阿历真度加拿祖左路传中，安东尼远柱赶到接应，2码对住个空门竟然“冲过龙”，将个波撞番畀对方龙门接住，直播评述麦哥斯特表示：“好靓嘅组织、恐怖嘅射门...点解安东尼要瞓低铲埋去？难以置信！”
曼联花1亿欧元转会费买入嘅安东尼，据报已被挂牌出售但卖唔出，《天空体育》报道曼联依家退而求其次，同意将佢外借减少20万镑周薪负担，西甲嘅贝迪斯有意借用，但要求曼联承担佢至少一半人工，经过今场嘅表现，相信曼联贴钱都要送走佢。
