東網電視
更多新聞短片
米基摩亞成為歐洲賽史上最年輕入波的英格蘭球員。(Getty Images)
周五(31日)凌晨歐霸盃，熱刺主場以3比0大勝艾夫斯堡，獲得第4位，直接晉級16強，3位「04後」小將成為主角，一齊入波，經此一役後，領隊普斯迪高路應該考慮畀多啲機會年輕球員，提升球隊成績。
熱刺今季成績令人失望，近期甚至不敵2支英超護級球隊愛華頓、李斯特城，隊內多位主力表現備受批評。今場歐霸盃，呢支倫敦球隊上半場演出仍然冇起色，換邊後普帥立即作出3個換人調動。不過，最關鍵反而係2位較後時間入替嘅小將，20歲前鋒丹尼斯卡利特66分鐘上陣，4分鐘後就入波為熱刺打開紀錄。
19歲前鋒查爾仲犀利，81分鐘入替李察利臣，3分鐘後入波，今場擔任正選嘅前鋒米基摩亞補時建功，贈艾夫斯堡3蛋，米基摩亞更加以17歲零172日成為歐洲賽史上最年輕入波嘅英格蘭球員。賽後普斯迪高路大讚呢3位入波新星，認為佢哋一定會開心到瞓唔着。
不過，熱刺贏波亦付出代價，中堅達古仙受傷，未知需要抖幾耐。
