東網電視
更多新聞短片
祖奧菲歷斯有個好開始。(Getty Images)
AC米蘭喺冬季轉會窗執到寶，向車路士借用嘅祖奧菲歷斯，周四(6日)凌晨意盃8強首演，後備上陣12分鐘即入靚波，帶領「紅黑兵團」主場3比1擊敗羅馬，殺入意盃4強。
譚美阿巴謙今季由羅馬外借去AC米蘭，今場倒戈大發神威，上半場兩個入波為AC米蘭領先2粒；多夫碧55分鐘為羅馬扳回一城，不過後備登場嘅祖奧菲歷斯，70分鐘接應另一新兵辛迪亞高基文尼斯妙傳，單刀笠射建功，為AC米蘭鎖定3比1勝局。
AC米蘭贏波功臣譚美阿巴謙，今場被羅馬球迷狂噓，佢賽後表示：「所有人都知我對羅馬嘅感情，呢間球會對我好有意義，所以(被噓)感覺唔好受。可能佢哋(羅馬球迷)以為我慶祝入波，但我只係感謝上帝，足球就係咁樣。」
