東網電視
更多新聞短片
路易斯保方係進攻球員。
意大利傳奇保方被譽為史上最佳門將之一，佢嘅囝囝路易斯保方亦係職業足球員，最近更入選埋國家隊青年軍，不過佢就唔係代表意大利，而係為媽媽所屬嘅捷克而戰。
17歲嘅路易斯保方司職翼鋒，目前效力意乙球會比薩SC，雖然未曾代表一隊上陣，但佢喺U19嘅表現仍獲關注，捷克U18國家隊日前就徵召佢入伍。
路易斯保方嘅媽媽，係著名捷克模特兒莎維杜娃，雖然保方同莎維杜娃喺2014年已經離婚，但路易斯保方仍然可以選擇代表捷克出賽，而佢亦已接納捷克U18徵召。
捷克U18會喺3月21日同英格蘭U18踢熱身賽，路易斯保方有望作出處子戰。
