東網電視
更多新聞短片
曼聯積極開拓新財路。(Getty Images)
曼聯連續5年財政赤字，老闆拉特克利夫兩度大規模裁員，搞到球會怨聲載道。據英國《每日電訊報》報道，曼聯最新開發搵錢新招，就連麥湯米尼、格連活特等已離隊球員，都可以幫曼聯搵多最後一桶金！
據報曼聯近年喺賣人嗰陣，都會加入「二次分成」條款，即係當賣出球員將來畀新球會賣走，曼聯可以再收取一定比例嘅轉會費。好似英格蘭前鋒格連活特上年轉投馬賽，曼聯就有高達50%嘅「二次分成」；米積伯利去般尼(50%)、法根度柏利斯查去彭拿典奈高斯(45%)、麥湯米尼轉會拿玻里(10%)，通通都有呢個條款。
急於整靚條數嘅曼聯，似乎唔想「等運到」，有意提前「賣斷」呢個二次分成條款，換取即時收入。例如馬賽可以用較平嘅價格買斷條款，若果之後用高價賣走該英格蘭前鋒，轉會收入可以全數袋袋平安，可以話係一家便宜兩家着。
