東網電視
更多新聞短片
國際邁亞密冇美斯都大勝4比1。
周一(3日)早上美職賽事，國際邁亞密收起「球王」美斯下，作客照樣4比1大炒侯斯頓戴拿模。主隊球迷係今場大輸家，輸波之餘又睇唔到美斯比賽，侯斯頓戴拿模已宣布會送出免費波飛作為補償。
美斯喺美國大受歡迎，據報今場波飛炒到800美元兩張，不過國際邁亞密公布出征名單後，美斯榜上無名。據報美斯並冇受傷，只係休息留力周五(7日)嘅中冠盃16強賽事。
侯斯頓戴拿模隨後發聲明：「好遺憾我哋控制唔到對手用咩球員，仍然期待大家入場支持球隊，為咗答謝入場球迷，我哋會送每人一張免費波飛，可以睇球隊今季任何一場比賽。」
國際邁亞密雖然有美斯休息，但仍憑施高維亞(2球)、艾蘭迪同蘇亞雷斯入波，作客輕鬆大勝4比1，開季2輪聯賽1勝1和。
