東網電視
更多新聞短片
格連活特下半場入替。
周日(9日)凌晨法甲爆出冷門，第2位馬賽主場0比1不敵朗斯，被榜首巴黎聖日耳門(PSG)進一步拋離16分，爭標幾乎絕望。賽前馬賽教練迪薩比「雞蛋挑骨頭」，指首席射手格連活特表現「未夠好」，今場將佢貶後備，成為輸波主因之一，呢位意大利名帥今次玩殘自己同球隊。
格連活特今季加盟馬賽，踢24場聯賽入15球，射手榜上僅次於入20球嘅PSG翼鋒奧士文尼迪比利，表現備受肯定，但迪薩比日前接受傳媒訪問時，仍然不滿呢位前曼聯球星演出：「我認為格連活特可以做得更多、更好，如果佢想捧盃，就應該作出犧牲同付出。」據悉迪薩比最唔滿意格連活特未有積極參與回防。
馬賽今仗迎戰朗斯，迪薩比「言行一致」將格連活特擺後備席，球隊上半場入唔到波，迪薩比知衰，換邊後立即換入格連活特，但已自亂陣腳，戰至補時被朗斯中場艾拿奧爾攻入全場唯一入波，慘遭絕殺，近3場聯賽輸2場。
馬賽將於下場聯賽作客巴黎聖日耳門，相信迪薩比應該會「跪低」畀番格連活特擔正。
