東網電視
更多新聞短片
多古向球證示意對方並冇犯規。
曼聯喺歐霸盃16強大炒皇家蘇斯達晉級8強，贏波之餘仲贏埋掌聲，小將柏德列多古下半場曾殺入禁區博到12碼，不過佢就食咗「誠實豆沙包」，主動同球證講對方並冇犯規，球證最終取消判決，多古嘅行為亦獲各界讚揚。
今場比賽特別多12碼，頭3個入波都係嚟自極刑，曼聯領先2比1嘅12碼就係由多古博到。呢位丹麥新星之後再次博到12碼，但佢即刻彈起身同球證講「唔係12碼」，VAR快速檢查後亦同意佢所講，12碼判決取消，而曼聯最後亦順利入多2球。
對於多古嘅體育精神，曼聯領隊魯賓艾摩廉同樣誠實咁回應：「睇情況啦！呢個係正確嘅做法，我以佢為榮，但如果當時係0比0或者落後緊，我唔敢講我會有相同嘅回應。多古踢得好好，佢有非常出色嘅體能，絕對可以喺英超立足。」
