東網電視
更多新聞短片
摩連奴(右)對於出局感到無奈。(Getty Images)
周五(14日)凌晨歐霸盃16強次回合，由摩連奴執教嘅費倫巴治作客以2比0擊敗格拉斯哥流浪，兩回合合計打和3比3，需要互射12碼分勝負，費倫巴治有3位球員宴客，黯然出局，摩連奴「歐戰專家」招牌慘遭打爛。
費倫巴治首回合主場意外輸1比3，今仗作客豁出去一搏，憑中場施巴斯坦施文斯基梅開二度贏2比0，總比數扳平3比3。由於雙方加時冇波入，惟有互射12碼分勝負，費倫巴治嘅杜辛泰迪治、費特、恩達斯射失，至於格拉斯哥流浪4射3中，贏3比2晉級8強，將會對畢爾包。
摩連奴曾以主帥身份贏盡歐洲3大盃賽，包括協助波圖、國際米蘭捧歐聯，為曼聯奪得歐霸盃冠軍，3年前率領羅馬成為歐協聯盟主，但今次執教費倫巴治，卻16強止步，難免令人失望。近期盛傳呢位62歲葡萄牙名帥可能今夏離隊，唔排除重返意甲或英超搵食。
