东网电视
更多新闻短片
C朗(右)开赛4分钟就入波。(Getty Images)
去片睇C朗发脾气
周六(15日)凌晨沙特阿拉伯职业联赛，艾纳斯主场以3比1击败艾科鲁特，巨星C朗迅速射入1球，为球队先开纪录，但佢仅踢咗61分钟就被换走，令呢位40岁葡萄牙国脚非常冇瘾，更加脾气直接行入更衣室，摆明唔妥教练皮奥利，唔少球迷力撑C朗，睇怕呢位意大利名帅好快饭碗不保。
开赛4分钟，C朗把握门前混战，补射入网，将职业生涯总入球增加至928球。跟住另1位球星沙迪奥文尼射成2比0，加上贵价新兵祖汉杜兰劲射入网，艾纳斯上半场已经领先3球。
战至56分钟，艾纳斯右后卫布华殊“两黄变一红”被逐后，皮奥利一次过作出3个换人调动，包括换走C朗，平衡攻守人脚。不过，C朗认为冇理由换走自己，立即黑晒面，并且唔返后备席，直接行入更衣室，期间摊开双手，可见佢非常不满皮奥利嘅换人决定。C朗离场后冇耐，艾科鲁特追番1球，但无阻艾纳斯全取3分。
赛后沙特当地舆论一面倒支持C朗，唔少球迷及网民批评皮奥利换走C朗，阻碍佢创造入1000球壮举。艾纳斯现时落后榜首伊蒂哈德10分，争夺联赛冠军机会渺茫，加上皮奥利今次得罪“大佬”C朗，恐怕佢好可能会被炒。
