東網電視
更多新聞短片
尼馬近年經常受傷。(Getty Images)
尼馬上月初重投巴甲母會山度士，表現不俗，日前獲巴西國家隊主帥杜利華祖利亞揀選入大軍名單，但好景不常，呢位33歲前鋒宣布，因為傷患問題退隊，無法為「森巴兵團」出戰3月底2場世界盃外圍賽對哥倫比亞及阿根廷。
尼馬發表聲明話：「本來好接近重返國家隊，但好不幸，我呢個時候唔能夠再次披起呢件世界上最沉重嘅球衣，大家經過詳盡討論後，達成共識，決定唔作出冒險，令我有足夠時間處理傷患，希望可以完全康復，感謝各位支持我嘅人。」尼馬對上1次為巴西上陣已經係2023年10月世盃外對烏拉圭，佢該仗受重傷，導致休養長達1年。
尼馬退隊後，杜利華祖利亞已補選皇馬前鋒安迪歷，填補其位置，曼城門將艾達臣摩拉斯、法明林高後衞丹尼路雷斯亦因傷退隊，里昂門將盧卡斯佩利、法明林高後衞阿歷士辛度獲補選入「森巴兵團」。巴西將於3月21日早上主場對哥倫比亞，5日之後作客阿根廷。
