東網電視
更多新聞短片
曼聯班主現身F1平治車隊。
新一年度F1開鑼，澳洲站賽事見到曼聯班主拉特克利夫身影，佢喺車房親自落場，觀看自己擁有嘅平治車隊比賽。
周六(15日)排位賽，鏡頭影到平治車隊房內嘅「拉爵」，佢戴住耳筒同對講機，全神貫注留意賽道情況。資料顯示，英力士集團係平治車隊贊助商，而拉特克利夫佔平治車隊33%股份。
曼聯方面，「拉爵」對球隊大力推行開源節流方案，似乎效果一般，據報曼聯現時每星期向受傷球員支薪多達110萬鎊(約1,100萬港元)。
據統計，「紅魔鬼」傷兵多達10人，包括多名高薪球員，例如周薪20萬鎊嘅美臣蒙特、19萬鎊嘅哈利馬古尼、15萬鎊嘅勞基梳爾等，球隊財政負擔相當沉重。
