东网电视
更多新闻短片
沙拿表现令球迷失望。(Getty Images)
周一(17日)凌晨英联杯决赛，利物浦喺被一致睇好下不敌纽卡素，5日内痛失2个冠军机会。今季表现神勇嘅穆罕默德沙拿，喺决赛表现反常全场隐形，踢足90分钟但0射门同0创造机会，生涯11场决赛未试过有非12码入波，唔少球迷热议系“斋戒月”影响沙拿表现。
沙拿今季不断用入波同助攻引领利物浦前进，不过近期表现下滑，上周欧联16强对巴黎圣日耳门(PSG)被对手完全冻结，最终“红军”输波出局。今场决赛对纽卡素，沙拿0次射门同0次创造机会，系佢利物浦生涯首次踢足全场而喺呢两项数据“食蛋”。
沙拿被誉为当今最强前锋之一，但佢踢决赛嘅表现往往会打折扣，统计显示沙拿历来踢过11场决赛，但只喺2019年欧联同2022年社区盾靠12码入波，从来未曾喺决赛生波情况下入波。
沙拿嘅反常表现引起球迷热议，由于依家正值“斋戒月”，作为穆斯林嘅沙拿同伊巴希马干拿迪，按照习俗由日出到日落期间禁止进食，利物浦亦特别为两人更改训练内容帮助适应，有球迷认为呢个系沙拿近期跌watt嘅原因。
