東網電視
更多新聞短片
馬連奴頭槌頂入全場唯一入波。(Getty Images)
紐卡素喺英聯盃勇奪冠軍，英超前4爭逐戰亦傳嚟好消息，繼曼城失分之後，車路士周日(16日)作客0比1不敵阿仙奴，令前4競爭更緊湊。依家第4位(車路士)到第10位(般尼茅夫)只相差5分，不過排第6嘅紐卡素就比其他競爭對手踢少1場，形勢最好！
車路士作客阿仙奴一仗，核心人物高爾彭馬因傷缺陣，早段阿仙奴形勢佔優，20分鐘靠招牌角球攻勢，由米基爾馬連奴精彩頭槌建功。車路士落後下積極反撲，成功拎番主導權，但實際做到嘅埋門少之又少，最終0比1輸波。
車路士輸波後，繼續以49分排喺第4位，力壓曼城(48分)同紐卡素(47分)。由於紐卡素今周踢英聯盃決賽而輪空，所以佢哋係踢少1場，如果計失分嘅話紐卡素先至係「領先」嘅一隊。依家英超第4至第10位只差5分，前4爭逐「7國咁亂」。
車路士領隊馬利斯卡賽後表示：「今季兩次對住阿仙奴，我覺得兩隊表現分別唔大，今場唯一分野就係死球，呢方面阿仙奴係大師級。我覺得車路士已經向住正確方向前進，依家最重要係行前多一步，拎到下屆歐聯參賽資格。」
