东网电视
更多新闻短片
施洛对纽卡素踢法有微言。(Getty Images)
利物浦喺英联杯决赛大热倒灶，被纽卡素嘅体力化踢法打爆，被批评拒绝轮换嘅领队施洛，赛后讽刺纽卡素用粗线条打法，承认喺“高Q大棍”范畴唔及纽卡素。
利物浦上周中踢完欧联16强，今场决赛体能难免输蚀，施洛赛后话唔确定系咪体能出事：“呢场波只系大量嘅争抢，唔讲求跑动嘅强度，我判断唔到球员系咪疲倦，平时会喺逼抢嘅强度上睇到，因为纽卡素只系大脚踢前再去抢，我哋连逼抢机会都冇。”
施洛进一步表示：“如果个波长时间喺天空，同纽卡素踢10次我哋会输9次，因为佢哋高空波强过我哋，第1同第2个入波都系咁样出现，喺空战呢方面纽卡素更强，所以佢哋赢波。”
对于有指利物浦被技术性击倒，施洛就有唔同睇法：“纽卡素赢到更多争抢，咁系咪技术性击倒？呢个系纽卡素最强地方，制造大量高空争夺并赢出争抢。不过我心目中嘅击术性击倒，系令到对手波都掂唔到、次次都可以突破逼抢去进攻。我要承认，纽卡素喺佢哋嘅风格上系值得赢波。”
