東網電視
更多新聞短片
祖雲達斯罕見連續大敗。(Getty Images)
周一(17日)凌晨意甲，祖雲達斯作客0比3慘敗費倫天拿腳下，連同上星期主場吞阿特蘭大4蛋，意甲2連敗兼捧7隻光蛋，已跌出聯賽前4位。據Fabrizio Romano報道，祖雲達斯依家冇打算換帥，但會考慮喺球季結束後另覓長遠領軍人選。
祖雲達斯原本係意甲失球最少球隊，但近2仗突然崩潰接連大敗，教練莫達賽後表示：「我哋進攻同防守都有需要改善，防守本來係我哋強項，但球員心態出現問題，2場失7球唔可以接受，一定要搵方法解決。」
統計顯示，莫達自上年夏天執教祖雲達斯後，喺意甲場均拎1.79分，係近30年來祖記第4低分教練，莫達賽後被問到會唔會辭職，佢就回應：「辭職太容易，但我唔鍾意容易嘅事。我哋需要贏波，要搵方法去達成入前4嘅目標，依家要做係去反思，準備下一場比賽。」
