东网电视
更多新闻短片
加历查囝囝代表马尔他出赛。
英格兰名宿加历查近年做“讲波佬”人气高企，佢嘅囝囝占士加历查亦打出名堂，效力韦根嘅占士近日入选国家队，不过就唔系代表老窦踢嘅英格兰，而系帮马尔他出战世杯外，嚟紧有机会大战罗拔利云度夫斯基添！
22岁嘅占士同老窦一样踢中坚，今季喺英甲球会韦根成为主力，23场联赛有1球进帐，表现获马尔他垂青。由于加历查爸爸有马尔他血统，加历查同占士两父子上个月就获得马尔他公民资格，占士亦随即被选入新一期世杯外名单。
马尔他今个月将会喺世杯外欧洲区G组，主场对芬兰同埋作客波兰，担任中坚嘅占士有机会大战波兰神锋罗拔利云度夫斯基。马尔他足总主席华沙路表示：“我哋同加历查倾咗几个月，佢哋对加入马尔他表示欢迎。我哋会继续物色可以代表马尔他嘅球员，其他国家都咁样做，有咩问题？”
