绿茵场上绽放最美光芒　足球女将有实力更有样

电视台实况节目《足球女将》热播，事实上当今球坛巾帼不让须眉，女子足球发展愈嚟愈蓬勃。世界杯、欧国杯、欧联及英超等大赛都有女足版本，令以往被视为“球场花瓶”嘅女子队有大显身手舞台，并且叫好又叫座。3年前女子欧联巴塞大战皇马，更创出超过9万人入场观战盛况，掀起女足狂热，今日就为大家严选12位球技同美貌并重嘅足球女将！<br/><br/>●安娜马高域性感无极限<br/>Ana Maria Markovic<br/>国籍：克罗地亚<br/>年龄：25<br/>球会：达明尼斯<br/>位置：前锋<br/><br/><br/>身高1米73嘅安娜马高域拥有天使面孔、魔鬼身材，外形似模特儿，被誉为世界上最靓及性感女子足球员，佢嘅社交网帐户Instagram拥有超过316万“粉丝”，魅力劲过唔少当打男足球星。不过呢样亦令安娜有唔少烦恼，皆因经常被歧视同性骚扰：“当我同夏兰特一样将喺泳池边影嘅相放上网，网民反应好唔同，佢哋只会同我讲有关性嘅说话，试问佢哋点会咁样对夏兰特。”安娜话最想球迷欣赏女子球员喺球场上嘅表现，而非外表。<br/><br/>●女球王邦玛迪荣誉无数<br/>Aitana Bonmati<br/>国籍：西班牙<br/>年龄：27<br/>球会：巴塞隆拿<br/>位置：中场<br/><br/>出身于巴塞隆拿青年军嘅邦玛迪，一直效力呢支西甲劲旅，更协助巴塞女足赢得5次女子西甲、3次女子欧联、6次女子西班牙杯等多项重要锦标，亦系西班牙捧走2023年女子世界杯冠军嘅功臣，并当选2023及2024年世界足球小姐及女子金球奖，堪称当今女球王。邦玛迪以技术细腻、踢法优雅见称，曼城主帅哥迪奥拿都对呢位同乡赞不绝口：“睇邦玛迪踢波，可以令人完全爱上足球，佢就好似‘女子版恩尼斯达’。”<br/><br/>●孖辫妹萨菲娜够吸睛<br/>Safira Ika<br/>国籍：印尼<br/>年龄：21岁<br/>位置：后卫<br/>球会：DKI雅加达女足<br/><br/><br/>印尼喺女足球坛唔算好出名，甚至打入亚洲杯4强，已经系接近40年前嘅事，不过近年引起外界关注，事关21岁嘅萨菲娜火速冒起。咪睇佢年纪轻轻，其实已经系印尼女足队长兼“大家姐”，孖辫造型喺场上风驰电掣实在吸睛。萨菲娜喺IG就经常向超过102万粉丝展示少女一面，长裙、小背心、化妆、扮靓乜都分享，同时亦系多个品牌代言人。萨菲娜上年4月曾经到日本球会试脚，虽然未有下文，但佢话唔会放弃呢个目标。<br/><br/>●碧克丝甸纽丝低调富婆<br/>Stina Blackstenius<br/>国籍：瑞典<br/>年龄：29岁<br/>位置：前锋<br/>球会：阿仙奴女足<br/><br/><br/>阿仙奴女足近年成绩比男足有过之而无不及，当中瑞典球星碧克丝甸纽丝功劳唔细，以速度同射术见称嘅佢，依家属阿仙奴女足同瑞典女足领军人物，最大目标当然系捧走女子欧联，同帮国家队喺大赛拎到好成绩。碧克丝甸纽丝比赛嗰阵扎起一大束金色马尾，五官同身材都系模特儿级别。据报佢身家高达150万美元（约1,170万港元），大部分嚟自球会合约同赞助费，但佢仍然行事低调，落到球场至会展露真我个性。<br/><br/>●丹妮云迪当恋爱大过天<br/>Danielle Van De Donk<br/>国籍：荷兰<br/>年龄：33岁<br/>位置：中场<br/>球会：里昂女足<br/><br/><br/>丹尼云迪当被公认为欧洲女足最佳中场之一，由阿仙奴女足到里昂女足，以至代表荷兰女足都赢过唔少大赛冠军。里昂女足目前顺利杀入欧联8强，核心人物丹妮云迪当自然功劳十足，成就足以跻身女足传奇行列。丹尼云迪当感情生活多姿多彩，之前同英格兰女足球星美迪拍拖，试过喺比赛中不满爱人被踢，激动走去推撞球证。不过佢同美迪已经甩拖，依家新爱人系里昂队友、澳洲球星艾莉卡宾达。<br/><br/>●乌花兰靠斗志迎难而上<br/>Manon Uffren<br/>国籍：法国<br/>年龄：27<br/>球会：南特女足<br/>位置：中场<br/><br/>由于老窦系地区球队主席，乌花兰5岁就开始接触足球，佢最初系打后卫，未够18岁就加盟法甲球队蒙彼利埃女足，但因为竞争太大，加上膝头十字韧带受伤要长抖，一度暂停职业生涯。不过呢段经历令乌花兰变得更坚强，2024年1月宣布复出，毅然加盟乙组南特女足，不但接受带队争升班嘅挑战，仲改踢防中，表现大获好评，成功协助南特女足重返甲组，证明呢位眼大大嘅可人儿唔系得个壳。<br/><br/>●妹猪柏迪逊“禾秆冚珍珠”<br/>Poppy Pattinson<br/>国籍：英格兰<br/>年龄：24<br/>球会：白礼顿女足<br/>位置：后卫<br/><br/><br/>柏迪逊8岁就喺新特兰女足青年队受训，之后辗转效力过曼城、布里斯托城及爱华顿女足，2022年转投白礼顿女足，呢位铁卫凭住硬朗打法喺球队站稳阵脚。柏迪逊先后入选过英格兰U17、U19、U21同U23梯队，当然想更上一层楼成为“女三狮”大国脚。柏迪逊平时比赛时会束起金色长发，少少Baby fat加上甜美笑容，“妹猪味”十足。佢今年1月去杜拜旅行，更喺IG尽骚弗爆身材，真系“禾秆冚珍珠”。<br/><br/>●“拉丁系”辛达素靓爆意国<br/>Agata Isabella Centasso<br/>国籍：意大利<br/>年龄：34<br/>球会：威尼斯女足<br/>位置：中场<br/><br/>辛达素自幼就喺屋企后花园同爸爸及两个兄弟踢波，慢慢爱上足球，佢拥有典型拉丁美女特质，标致嘅五官、深棕色长发及高挑身形，配合迷人笑容，被喻为意大利最美丽女足球员，虽然只系效力乙组嘅威尼斯女足，并且已经名花有主，但于IG不时派福利，依家有超过80万粉丝。辛达素身为意大利人，但就系英格兰女足粉丝，2022年“女三狮”勇夺女子欧国杯冠军，佢即时喺社交平台祝贺爱队。<br/><br/>●阿迪安娜莉安多才多艺<br/>Adriana Leon<br/>国籍：加拿大<br/>年龄：32<br/>球会：圣地牙哥波浪女足<br/>位置：翼锋<br/><br/><br/>阿迪安娜莉安身为加拿大女足世杯三朝元老，同时系现时国家队嘅“大家姐”，地位无可取代。阿迪安娜莉安运动天赋出众，年幼时系一位花样滑冰及冰球运动员，直至2010年读大学时，先开始转玩足球，点知一踢就踢咗15年，更成为加拿大女足嘅代表人物。阿迪安娜亦曾试过出国搵食，生涯效力过韦斯咸女足同曼联女足，2021年带领加拿大国家队夺得东京奥运女足金牌，系佢女足生涯巅峰之作。<br/><br/>●莉雯粉丝数劲过费达拿<br/>Alisha Lehmann<br/>国籍：瑞士<br/>年龄：26岁<br/>球会：祖云达斯<br/>位置：前锋<br/><br/><br/>祖云达斯女足前锋莉雯嘅IG有1,665万Follower，比瑞士网球天王费达拿嘅1,278万仲多，系瑞士最多Follower嘅运动员，同时亦担任多年内衣品牌代言，IG大把靓相任睇。莉雯现时男朋友杜格拉斯雷斯同样效力祖记，不过莉雯场上表现似乎比男友更好，佢带领祖记女足喺女子意甲排榜首之馀，同时打入女子意杯决赛，叫胡“双冠”。呢位瑞士女子国家队代表速度及射术兼备，为国家队上阵58场入9球，真正睇得又踢得。<br/><br/>●长谷川唯数据冠绝英超<br/>Yui Hasegawa<br/>国籍：日本<br/>年龄：28<br/>球会：曼城女足<br/>位置：中场<br/><br/>长谷川唯系日本女足长期主力，2021年远赴欧洲发展，最初踢AC米兰，但好快转到女子英超加盟韦斯咸女足，2022月9月转投曼城至今。长谷川唯能够喺欧洲立足绝非靠运，上季入选女子英超最佳阵容，前年女子世杯亦系日本女足领军人物。阿“Yui”今季喺曼城偏向担任防守中场角色，传球成功率超过80%，堪称英超“数据后”，佢话曼城嘅风格好夹自己，希望球队不断增强实力下，可以赢得各项锦标。<br/><br/>●沈梦露铿锵玫瑰新代表<br/>Shen Menglu<br/>国籍：中国<br/>年龄：22<br/>球会：利华古逊女足<br/>位置：中场及左闸<br/><br/>年仅22岁嘅江苏姑娘沈梦露，可以话系“女版C朗”，2021年到欧洲发展首站，就是C朗母会士砵亭女足，之后改投些路迪，去年夏天加盟利华古逊至今。效力些路迪期间，同来自上海嘅沈梦雨组成“雨露组合”，协助球队赢得女子苏足杯，不过呢对“冠军拍档”随着沈梦露离队而暂时拆伙，睇下未来有冇重逢嘅一日。同时间中国女足对沈梦露有极高期望，致力栽培佢成为“铿锵玫瑰”未来领军人物。<br/><br/>●欧联女主持 Eva Murati<br/><br/>除咗场内球员之外，最近阿尔巴尼亚欧联女主持Eva Murati都突然爆红，原因系一场欧联后，呢名29岁靓女用英文、西班牙文及意大利文访问唔同球员，而且对战术分析及对球员背景都滚瓜烂熟，短片喺网上疯传。Eva Murati本身系一名演员及模特儿，2017年开始主持欧联节目，佢喺节目经常打扮得专业又靓女，虽然已经做咗8年，但伊人透露，仍然唔少人话佢“花瓶”，又收到不少性别歧视嘅讯息。<br/>