东网电视
更多新闻短片
迪比利同麦巴比将组成梦幻锋线。(Getty Images)
法国近年都系靠基利安麦巴比“食胡”，不过奥士文尼迪比利今季大熟大勇，入球数字同麦巴比不相伯仲。据报法国领队迪甘斯打算效法巴黎圣日耳门(PSG)教练安历基嘅战术，务求令迪比利可以喺最佳位置持续交货之馀，又可以同麦巴比完美融合，组成最恐怖嘅前锋组合。
麦巴比今季有31个入波、迪比利亦有30球进帐，两人都系当时得令嘅前锋杀手，不过正前锋位置只得1个，法国主帅迪甘斯表示：“迪比利以往踢翼锋，唔能够经常保持最高效率，但依家踢前锋更接近龙门，有更多创造嘅选择，信心爆棚，表现出极高效率。”
对于迪比利同麦巴比共存，迪甘斯就话：“麦巴比可以踢左翼，但佢更锺意喺中间享受更多自由度，所有进攻球员都想要自由，所以我嘅排阵亦唔会固定，要增加不可预测性，同将球员安排喺最佳位置。”报道指迪甘斯将安排迪比利担任“假9”，令左翼麦巴比有更多时间入楔中间，理论上会系个好好嘅配搭。
