東網電視
更多新聞短片
甘美治同執波仔完美配合。
德國周一(24日凌晨喺歐國聯8強，兩回合計以5比4淘汰意大利，最大功臣非甘美治莫屬！呢位拜仁慕尼黑球星喺兩場比賽，交出1入波同4助攻包辦晒德國全部入球。今場甘美治更展示足球智慧，上演「古惑角球」助攻好戲，而佢賽後亦答謝醒目執波仔配合，令偷襲成功。
上半場36分鐘，德國頭槌攻門被撲出得到角球，正當意大利球員大安旨意慢慢布防，連門將基安盧基當拿隆馬都走咗出去指揮，留低穆斯亞拿一個人留喺小禁區，甘美治就第1時間開出角球，令穆斯亞拿輕鬆射入空門。
甘美治「醒水」快開角球，亦要多得執波仔嘅快速配合，甘美治完場後專登走去搵番個執波仔，並將個簽名足球送畀佢做禮物。呢位執波仔賽後表示：「我喺角球旗附近，見到甘美治同我有眼神交流，佢想要個波，我就即刻掟畀佢，之後就入咗波，我好開心。今次係我第一次做執波仔，甘美治話多謝我畀咗一次助攻佢。」
