東網電視
更多新聞短片
艾達古拿同蘇保斯拉爾發生衝突。
球場上面發生衝突場面司空見慣，不過利物浦中場蘇保斯拉爾同皇家馬德里新星艾達古拿，近期就喺國際賽離奇結怨，事後仲發展成「小學雞式」抽水互窒，網民就狂食花生。
話就土耳其日前喺歐國聯升降班附加賽，兩回合計6比1大破匈牙利「升班」。土耳其新星艾達古拿入波後，向曾經對佢「出口術」嘅匈牙利隊長蘇保斯拉爾做出「收聲」手勢。
唔順氣嘅蘇保斯拉爾賽後抽水，喺一則報道入面留咗個神秘數字「1088」還擊，原來1088係艾達古拿今季喺皇馬上陣嘅分鐘，寸呢位20歲小將只係一個「大後備」。
艾達古拿亦唔係善男信女，隨即再喺IG貼出次回合3比0比數，同埋兩人衝突相片，留言：「呢個人係個笑話，6個入波都唔夠令你收聲咩？」
