东网电视
更多新闻短片
安察洛堤系巴西足总最大目标。
足球王国巴西近年成绩跌落谷底，周三(26日)世杯外1比4惨败死敌阿根廷脚下，被视为巴西史上最羞家演出之一，领队杜利华祖利亚面临炒鱿。据报巴西足总急展救亡计划，日前宣布连任嘅足总会长艾拿度，即时重启斟介皇家马德里教练安察洛堤执教，协助换帅行动嘅“大哨”朗拿度亦表示有希望实现。
巴西喺世杯外南美洲区只排第4位，若非今届世杯扩充令南美有6队直接出线，巴西入唔入到决赛周都成问题。不过巴西低迷表现已令球迷愤怒，前锋云尼斯奥斯祖利亚亦表示需要重建：“我哋要重新审视依家所做嘅一切，明年就系世界杯，我唔想再输多次，压力将会更加大，巴西国民希望我哋赢波。”
据《环球体育》报道，杜利华嘅帅位已岌岌可危，足总周五(28日)将开会决定佢嘅前途，而日前宣布连任足总会长嘅艾拿度，正正系2年前力斟安察洛堤嘅话事人，艾拿度当年为等待安察洛堤加盟，宁愿搵看守领队带巴西接近1年而受诟病，足证佢对该意大利名帅嘅着迷。
《The Athletic》、《ESPN》等媒体报道，巴西已再次同安察洛堤进行接洽，盛传65岁嘅“肥安”将喺夏天离开皇马，带领巴西出战世杯将系千载难逢机会，而且佢对巴西国脚云尼斯奥斯、洛迪高高斯、艾达米列达奥、安迪历等都好熟悉，系重建巴西最佳人选。
皇马阵中有多位巴西国脚。
退选巴西足总会长嘅朗拿度，将会协助艾拿度斟介安察洛堤行动，佢日前表示：“我都有份帮手斟安察洛堤，当年失败原因系皇马唔放人，佢最后帮皇马拎欧联冠军，令球队决定留低佢，否则佢已经系巴西领队，呢个计划并唔系一个幻想。”
