東網電視
更多新聞短片
阿諾特被利物浦球迷視為反骨仔。
利物浦青訓球星阿歷山大阿諾特，據報已同意夏天自由身加盟皇家馬德里，消息曝光後激起千層浪，大批球迷對呢位「反骨仔」非常不滿，有球迷更公開燒爛阿諾特件波衫洩忿，影片網上瘋傳。報道指利物浦會考慮提早放人，畀阿諾特代表皇馬出戰6月世冠盃。
26歲嘅阿諾特曾表示夢想係做利物浦隊長，不過一直唔肯答應續約，轉會皇馬消息雖然仍未證實，但球迷已經心碎，大批粉絲要求領隊施洛唔再畀佢上陣，更有球迷上載焚燒阿諾特66號波衫嘅影片，短時間內有近40萬人觀看，亦有接近5,000人「畀Like」
另外，英國《每日郵報》報道，皇馬希望阿諾特可以參加今夏世冠盃，而皇馬首戰會喺6月19日對希拉爾，不過阿諾特同利物浦合約就去到6月底先完結。國際足協為世冠盃球隊，喺6月1號開設「特別轉會窗」，畀佢哋註冊新球員參賽，而利物浦球季5月底完結，如果提前放阿諾特，亦可以慳番1個月人工。
