東網電視
更多新聞短片
奧利華係英超最頂尖球證。(Getty Images)
英超球證嘅執法水平長年受到詬病，不過人工同待遇就非常優厚，英國《泰晤士報》近日公開英超球證薪酬架構，其中頂級球證好似奧利華同安東尼泰萊，年薪高達25萬鎊，比飛機師、CEO更加好搵！
英國職業裁判員公司(PGMOL)總監韋比，日前喺聯賽會議上公開球證收入，英超球證平均年薪為17.5萬鎊，當中包括基本人工、表現獎金同落場費等等，而奧利華、安東尼泰萊等頂級球證，年收入約25萬鎊。唔好忘記，佢哋仲可以出去「搵外快」，好似奧利華就曾獲高薪聘用去中東地區執法，引嚟利益輸送質疑。
雖然同球星相比，球證嘅人工仲有大段距離，但英國《太陽報》報道，17.5萬鎊嘅平均年薪喺英國已經超高，同其他「理想」行業比較，英國嘅飛機師/航空交通控制員平均年薪約9.1萬鎊、公司總裁同IT總監平均年薪係8.1萬鎊，通通唔及做英超球證咁「名成利就」。
