東網電視
更多新聞短片
哈利卡尼(右)今場射入1球及1次助攻。(Getty Images)
拜仁慕尼黑喺周六(29日)晚德甲以3比2擊敗聖保利，前鋒哈利卡尼射入1球及1次助攻，並創下壯舉，職業生涯喺英超及德甲遇過51支球隊，都取得入球，「通殺」聯賽全部對手。
開賽17分鐘，拜仁慕尼黑就打開紀錄，米高奧利斯右路傳中，哈利卡尼順勢射入，呢個入波別具意義，因為呢位31歲英格蘭國腳出道以來，總共喺英超及德甲遇過51支聯賽球隊，全部都有波入，亦係佢今季第22個聯賽入球，繼續領先射手榜。聖保利亦不甘示弱，由前鋒伊拿斯沙特射入扳平。
換邊之後，米高奧利斯又貢獻助攻，長傳畀利萊辛尼勁射入網，其後呢位德國國腳接應哈利卡尼傳中，射成3比1，個人梅開二度。雖然聖保利補時入波追至2比3，但無阻榜首拜仁慕尼黑全取3分，結束過去2場聯賽1和1負頹勢，領先第2位利華古遜6分。今季德甲只剩下7輪聯賽，哈利卡尼有望打破職業生涯錦標荒。
