東網電視
更多新聞短片
羅拔利雲度夫斯基老而彌堅。
巴塞隆拿踏入2025年後勢如破竹，周日(30日)西甲主場4比1大破基羅納，喺聯賽錄得9連勝穩坐榜首。波蘭老將羅拔利雲度夫斯基今場又入2球，包括一記高難度精彩勾射，喺射手榜再度壓住基利安麥巴比排第1位。
巴塞66小時內連踢2場，完半場前靠對手擺烏龍領先，下半場早段被基羅納追平，不過巴塞愈戰愈勇，「羅拔佬」61分鐘接應隊友頭錘二傳，雖然衝過籠人前波後，但佢就展現超強柔韌性，跳起將個波喺身後凌空勾入。「羅拔佬」同費倫托利斯之後各自入多球，助巴塞大勝4比1完場。
巴塞依家領先次席皇家馬德里3分，36歲嘅「羅拔佬」賽後表示：「好多人談論我嘅年齡，但我身體狀況好好，數據同前幾年冇乜分別，我同以前一樣咁努力，希望可以喺最高水平踢多幾年。」「羅拔佬」依家有23個聯賽入波，1球領先麥巴比，對於金靴爭逐，呢位老將就話：「最重要係我可以對球隊有咩貢獻，如果我入2球，就會幫到球隊，最重要係巴塞贏波。」
