東網電視
更多新聞短片
美斯冇咗貼身保護。
美斯貼身保鏢卓高證實，佢被美職賽會同中冠盃賽會禁止進入球場草地，即日起美斯在場內失去私人保鑣保護，闖入球場嘅球迷都可以隨便埋佢身。
卓高被禁止入場嘅原因，係去年4月中冠盃國際邁亞密對蒙特雷，卓高同蒙特雷職員發生衝突，因為呢件事，近日卓高證實自己已經無法再進入美職同中冠盃賽場嘅草地，只容許進入更衣室同混合採訪區。
前軍人卓高坦言，對於美職賽會嘅裁決，佢只能接受，不過冇佢喺度，美職同中冠盃賽場將變成冇掩雞籠，佢話：「我喺法甲同歐聯做同樣工作長達7年，喺我面前發生嘅球迷闖入球場事件只發生過6次，但當我同美斯嚟到美國，20個月以來已經發生過16次。」
有卓高喺度，美斯喺比賽期間安全受到保障，依家冇咗佢，如果美職當局唔特別為美斯加強場邊保安，美斯落場比賽就有好大風險，可以預計，將會有更多攞簽名同合照嘅球迷衝入場。
