东网电视
更多新闻短片
莫耶斯对球证判决非常不满。
利物浦喺“默西赛德郡打吡”1比0赢爱华顿，向英超冠军迈进一大步，不过“红军”今场入波就引起争议，事关助攻嘅路易斯迪亚斯，一开始就明显处于越位位置，爱华顿领队莫耶斯赛后闹爆球证，不过球例上判决其实正确，利物浦领队施洛就话：“要怪就怪球例。”
利物浦下半场嘅入波，赖恩格云贝治中路直线想交畀迪亚斯(越位位置)，紧盯住佢嘅达高夫斯基快一步拦截，但迪亚高祖达抢到个波，随即同迪亚斯撞墙扭入中路射入。VAR覆核后证实入球有效，莫耶斯赛后闹爆：“今场比赛唯一分野，就系利物浦有1个越位入波，迪亚斯系影响到达高夫斯基解围，我唔明咁简单嘅判决点解都唔判？喺晏菲路比赛，应该唔系太多领队会觉得可以拎到有利判决。”
球例列明，如果处于越位位置嘅球员冇参与进攻，包括阻碍对手或意图阻碍对手踢波，就唔算系越位，迪亚斯喺呢一个并冇任何动作，所以球证判入球有效。施洛赛后亦“窒”莫耶斯：“根据球例，呢个系明显有效入球，冇人可以投诉，如果系我哋失呢种波，我都会好嬲，但我只会嬲条球例，而唔系完美执行球例嘅球证。”
