東網電視
更多新聞短片
拿玻里(藍衫)近9場聯賽只有2勝6和1負。(Getty Images)
周二(8日)凌晨意甲，第2位拿玻里作客被博洛尼亞逼和1比1，未能趁榜首國際米蘭失分，拉近積分距離，加上以拿玻里近9場聯賽僅2勝嘅頹勢，恐怕難以阻止國米捧盃。
國際米蘭上場被帕爾馬逼和2比2，拿玻里今仗只要贏波，就可以追至僅落後1分距離，呢支勁旅反客為主，開賽18分鐘率先打開紀錄，中場森保安古沙發揮驚人爆炸力，由中圈位置個人突破，擺脫對方兩位球員後，再推過門將史高盧比斯基，射入空門。跟住麥湯米尼亦有1次勁射，僅被史高盧比斯基撲出。
身為前4位份子嘅博洛尼亞下半場大反擊，戰至64分鐘扳平，贊斯奧特加特左路傳中，丹尼杜耶用後腳巧妙射入，技驚四座。
其後兩隊鬥攻，但未能再增添紀錄，打和1比1，拿玻里近9場聯賽只有2勝6和1負，繼續落後國際米蘭3分。今季意甲只剩下7輪賽事，上季冠軍國米好大機會帶到尾衞冕。
至於博洛尼亞聯賽6連勝走勢斷纜，領先第5祖雲達斯1分，博洛尼亞未來2場將惡鬥第3位阿特蘭大、國際米蘭，要保住前4位並非易事。
