當運氣麻麻嘅時候，真係咩都可以發生。踏入開倉第2季嘅黎昭昇，對上一次贏馬已經係3月20號嘅「魔法速遞」，換言之已經個半月兼連續12次賽事無進帳，尋晚跑馬地賽事以為靠初出馬「納百川」打開缺口，點知都係姍姍來遲跑第2名，然後強配潘頓嘅「穿甲鷹」就三甲不入，非常可惜。<br/><br/>到咗今個禮拜日沙田賽事，黎昭昇決定擺大頭，派9駒強陣出擊，睇嚟唔破悶局都唔會罷休，而頭場新馬賽嘅「超力量」，應該可以幫佢打破缺口。其實早前季內首場新馬賽，黎廐嘅「超力量」已經被捧成大熱門，可惜最終輸畀丁冠豪嘅「同得威」飲恨獲亞，但嚟到今次1000米新馬賽，後駒並無參戰，自然令「超力量」機會大大提升，無疑今場多咗3匹初出馬上陣，但玫瑰寶」、「歷險大將」早前一課試閘都係包尾而回，呂健威嘅「百勝威龍」試閘走勢亦唔太吸引，未必可以威脅到已有一次作賽經驗嘅「超力量」，機會樂觀。