隨着春武里在周六(29日)以亞軍完成今季泰國女子甲組聯賽，效力該隊的港將韋婉婷，其人生第2次外流生涯亦暫告一段落。儘管爭冠功虧一簣，但「韋婉」卻認為在彼邦生活的半年，絕對是得多於失，並正努力爭取在今年9月繼續外流。<br/><br/>今年2月，事隔3年再次外闖的「韋婉」，隻身飛赴泰國加盟春武里，她當時曾向記者表示：「好記得上次去阿爾巴尼亞之前，自己內心係充滿咗問號，好想知踢全職係點嘅，覺得生活只需要專心踢波，係好正嘅事嚟。今次出去我冇諗啲咩目標，只係希望可以盡快適應環境同球隊，踢到自己應有水準，仲有就係喺言語文化唔同嘅情況下，去同隊友、教練溝通，同埋建立默契。」不知半年之後，她覺得自己有沒有達標呢？「有呀！半年時間雖然過得好快，但好充實！大部份嘅時間都係足球，好似平時練波、去睇其他隊嘅賽事，同探嚟咗試腳嘅其他香港球員咁，之外就係比賽，生活上幾乎冇嘢須要去分心。」「韋婉」淡淡然道。<br/><br/>由於新一季的泰國女子聯賽，要在明年初才展開，「韋婉」表示尚未與春武里會方洽談續約，在未來兩個月會盡情去做自己想做的事，包括隨沙田對台灣集訓和旅行：「休息吓就要繼續努力喇！台灣返嚟會全力開吓工先（『韋婉』在港正職為健身教練），同時會睇吓出面有冇會搵，計劃喺9月會再出去踢，過咗年就再睇情況，我仲好想外流去挑戰自己。」<br/><br/>「韋婉」希望藉機會，感謝過去半年越洋支持她的每一位，特別在她未獲香港隊徵召後，不斷替其打氣和抱不平的球迷和傳媒。「好多謝曾經喺我入波，或者球隊贏波之後，留過言鼓勵我嘅朋友。仲有好多知道港隊冇選我之後，不斷為我打氣嘅每一位，收到晒！因為大家畀到我動力，我會好硬淨咁行落去，多謝大家！」「韋婉」表示稍後會澄清早前港隊主帥列卡度對其作出的指控。