【馬主連線】君達之友同丁仔有淵源

丁冠豪臨急臨忙開倉，卻得到唔少馬主支持，截至目前為止，丁廐已接收36匹馬，相信來投分子亦陸續有來。雖然大部分都係較年長嘅馬，但亦有九匹係三、四歲分子(新季計)，質新兵源未算太弱。

君達之友賽馬團體名下嘅「君達星」，上季三歲時已打開勝門，早熟有速度，不過暑期幕後選擇轉換新環境，由蘇偉賢改投新倉丁冠豪，當然希望愛駒今季有一番新景象。

呢個團體其中一位成員勞應海，之前曾經養過「威龍至尊」同「海龍皇」，「威龍至尊」喺1996年首次出賽，就係由丁冠豪所策騎，雙方總算有啲淵源，可惜當時大敗而回，其後人馬再合作兩次，始終無功而還。不過，「威龍至尊」改投方祿麟馬房後，表現脫胎換骨，轉倉首三戰已獲兩冠一季。如今「君達星」加盟丁廐，在新倉效應下，又會否有突破性演出呢？

君達之友賽馬團體

經理人：陳樹楠、羅有雄、龎瑞洪

會員：鄒競源、張興來、何德民、熊令德、勞應海