東網電視
更多新聞短片
「巴基之星」最佳拍檔布宜學處理惡搞馬係有一手。
1/2
高多芬主帥布宜學今年成績驕人，除咗幫老細旗下嘅「藍綠彩石」(Masar)歷史性贏得葉森打吡外，連莫雷拉都騎唔掂嘅絕世好馬「巴基之星」喺佢胯下亦成功變身贏女皇盃。稍後騎者將重掌呢匹馬嘅帥印出戰香港瓶，實在令人非常期待。布宜學唔止喺英港馬壇吃得開，最近去到日本客串都繼續有好表現，佢上陣第二日即成功力壓幾大外籍高手贏得個人喺日本首場G1勝仗，果然做得藍營主帥都有番咁上下。
話說尋日喺京都競馬場舉行嘅一哩冠軍賽，一對安田紀念賽冠亞軍馬「魔族雅谷」同「太空隕石」分別由李慕華同莫雅策騎，再次一較高下當然備受期待。可惜呢對熱門馬卻雙雙交唔出水準，反而由布宜學操刀嘅Stelvio卻有驚喜。呢匹只得三歲嘅「龍王」囝囝今場抽得1檔起步，一路守住個貼欄位置，入到直路更畀騎者順利搏到個好位，結果憑硬淨嘅騎功鬥贏由末段王杜滿萊操刀嘅上屆盟主「波斯劍客」奪冠。
而更搞笑嘅係，Stelvio入閘後疑似唔耐煩發脾氣，布宜學輕輕打咗佢個頭一下以作提示(片段:01:24起)，最終隻馬順利出閘完全冇受影響之餘，仲要贏埋添，唔通呢啲就係騎者處理惡搞馬嘅秘技？
日本一哩冠軍賽↓↓↓
尋日騎者幫「龍王」囝囝Stelvio(1號)勝出一哩冠軍賽。(Umabi_Official@Twitter)
