【大灰獸除名】呢五匹退役馬 屢建功勳奪下22W！

今日湧現退役潮，其中五匹加埋更加係贏得22場頭馬，全部都係有功勞嘅好馬！先講容廐大灰獸「平湖之星」，大前季累積5W，梁家俊更因揀佢而失去馬王「美麗傳承」主轡權，大家話當時「平湖之星」有幾咁吸引！不過之後呢匹逾千三磅大馬狀態直沉大海，昔日超多親朋逼爆凱旋門鏡頭未再重現了，早前更在馬會短途錦標不肯入閘，之後連番考閘亦故態復萌，最終畀競賽小組勒令退役，有點遺憾呀~

另一匹「天文學家」子嗣「非常堅」，這匹9歲老馬在港累積6W戰績亦彪炳，但上月因腳傷退出比賽運回從化後，就再冇於晨課露面，今日幕後亦安排老兵卸甲了。

方嘉柏4W馬「喜進」，也是在今日退役，此匹6歲馬其實上季4月退出賽事後缺陣到依家，既是健康有問題也不再蹉跎，馬主賞心悅目團體索性入紙除名。

經常召老將巫斯義回港操刀的8歲馬「壯思飛」，今日也在退伍名單中。「壯思飛」盛年時曾奪G3，更曾在一級賽董事盃僅敗於「喜蓮獎星」而壓下「步步友」得亞軍，可惜3捷過後狀態不濟，足足三季未有頭馬交出，剛剛尾場出賽更跑包尾，英雄遲暮歎奈何！

今日尚有韋達接手剛剛取到第4W的「肥仔」，8歲馬以勝利完結競賽生涯，希望你退役後有美好生活喇！