東瀛首日上陣 希威森殺低李慕華開齋

南非騎師希威森季初嚟到香港展開策騎事業，可惜喺南非有手尾跟，被罰停賽兩星期，復出之後喺香港嘅支持度唔算太多。不過，騎者態度樂觀，冇因為缺乏實力坐騎而灰心，雖然最後只以3W完結半季公司牌照，但已經獲得唔少練馬師同香港馬迷嘅敬佩。

希威森喺香港跑完上周日賽事之後，即轉戰日本展開兩個月嘅客串期，今日係騎者首次上陣，就即刻傳嚟贏馬嘅好消息。希威森喺中山競馬場策五駒上陣，而喺第八場2400米賽事中，佢策騎Masahaya Nice上陣，賽駒沿途守喺前列位置，其後喺直路透出，最後擊敗日本一哥嘅李慕華大熱門Scorpius，首天上陣就攞到東瀛首場頭馬兼殺低強敵，果然係個好開始！